REGULAE SANCTIMONIALIUM FONTIS EBRALDI.

Robertus de Arbrissello

REGULAE SANCTIMONIALIUM FONTIS EBRALDI.

Estratto da "Patrologia Latina", vol. 162 col. [1079], J. P. Migne 1854

(Michael COSNIER, Exordium Fontis Ebraldi. Flexiae 1641, 4o, p. 201.)

Haec sunt capitula regularia magistri nostri domini Roberti de Arbrisello, Petronillae primae abbatissae et nobis sanctimonialibus Ecclesiae Fontis Ebraldi, et aliarum cellarum eidem Ecclesiae pertinentium, data ab ipso ad custodiam religionis et disciplinae, dum viveret.

De habitu decenti sive modestia corporis [1079A]

I. Ut claustrales sanctimoniales omni tempore silentium teneant, exceptis illis quae exteriora procurant, quae tamen leviter non in clamosa voce, et necessaria verba loquantur.

II. Ut quaelibet signa non faciant nisi necessaria.

III. Ut honestatem et gravitatem claustralem, in quantum poterunt intus et extra custodiant.

IV. Ut omnes insimul eant ad ecclesiam, et insimul redeant, nulla earum aliquam ob causam in ecclesia remanente.

De vestimentis sive exteriori cultu.

V. Ut nunquam habeant vela nisi linea.

VI. Ut gimpae albae earum nunquam appareant, velis eas operientibus.

[1079B] VII. Ut capillos non nutriant suos.

VIII. Ut nunquam habeant tunicas et mantellos nisi de vilioribus pannis illius terrae, nativi coloris et intonsis, ad modum pedis et non ultra.

IX. Ut manicae tunicarum habeant latitudinis duos pedes, et longitudinem usque ad genua.

X. Ut nunquam habeant pelles, sive pellicias, vel coopertoria in lectis nisi agnina.

XI. Ut manicas pelliciarum faciant strictas, habeantque longitudinem ad summitatem digitorum, et dimidii pedis latitudinem pugno.

XII. Ut non habeant vestimenta fimbriata, neque in dorso neque in lecto, praeter belamiam, sed incisa consuantur, ut tunicae et chlamides et caetera omnia.

[1079C] XIII. Ut nunquam habeant superpelliceas nisi [(1) [1079C] Quidam tollunt nisi.] albas.

XIV. Ut nunquam habeant zonas ad cingendum nisi laneas.

XV. Ut nunquam induant gantos.

XVI. Ut nunquam sinant crescere capillos suos, sed tribus vicibus in anno radent illos novacula, sive forcipibus tundant per totum usque ad testam.

De itinere faciendo extra claustrum. [1080A]

XVII. Ut abbatissa aut priorissa non ducat secum in equitando quamlibet de nutritiis, vel juvenibus claustralibus.

XVIII. Ut nulla equitet sine duobus religiosis, et uno saeculari; et ad minus uno religioso, et uno saeculari.

XIX. Ut nulla loquatur in itinere nisi abbatissa, aut priorissa, donec perveniant ad hospitium.

De coquina.

XX. Ut ipsaemet sanctimoniales faciant coquinam.

De librorum dispositione.

XXI. Ut nulla earum praesumat extra libros Ecclesiae alicui tradere, aut alios a foris suscipere sine [1080B] licentia abbatissae.

De introductione in claustrum

XXII. Ut nulla praesumat, nec decana, nec priorissa, aliquem ad religionem suscipere sine praesentia abbatissae.

De clausura et occultatione monialium.

XXIII. Ut scholares et magistrae earum semper habeant custodem unam de senioribus conversis.

XXIV. Ut nulla sanctimonialium ostendatur foris alicui nisi jussu abbatissae: cum de aliqua hoc praeceperit abbatissa, priorissa, sive celeraria custodiat illam.

XXV. Ut se de pace nunquam osculentur, sed marmor eis traditum per fenestram ab omnibus osculetur [1080C] secretana illud administrante.

XXVI. Ut ad nulla opera facienda foras exeant de claustro.

XXVII. Ut sanctimoniales aliarum ecclesiarum non ingrediantur conventum earum, nisi abbatissa illas introduxerit, vel cui impositum est ab abbatissa.

XXVIII. Ut nulli liceat ingredi claustrum, sive [1081A] capitulum, sive reliquas officinas sine praesentia abbatissae.

De clausura monialium.

XXIX. Si vero aliquis dives homo aut peregrinus Christianus claustrum earum, absente abbatissa, videre cupierit; sanctimoniales abscondentur; et omnia necessaria custodiantur; et tunc fores ecclesiae aperiantur; et sic a majori priorissa sive celeraria et duobus vel tribus fratribus deforis intus illi homines introducentur; et claustrum, et capitulum, et monasterium et refectorium illis ostendatur.

XXX. Ut ostium ad altare a foris nunquam aperiatur nisi a celeraria; et nulla ingrediatur in chorum altaris sola, nec celeraria nec alia aliqua.

De officio celebrando et clausura.

[1081B] XXXI. Ut in ecclesiis earum nunquam vigiliae fiant a saecularibus.

XXXII. Ut dormitorium earum semper in die una conversa custodiat, et duae in nocte, vel quatuor: ante nocturnos una, et alia post usque ad diem, et haec cum candela.

XXXIII. Ut sacerdote ad celebrandum missam veniente, nunquam aperiatur ostium chori monialium, nisi solummodo ad communicandum, et cum communicaverit, abbatissa, vel decana, sive celeraria ibi semper custodiat.

XXXIV. Ut etiam cum presbytero et levita unus de clericis ad eas communicandas remaneat.

XXXV. Ut matutinali missa finita, aqua benedicatur, et benedicta sacerdos egrediatur, et celeraria [1081C] et secretaria ad firmandum ostium post eum: videantque celeraria et secretaria, ne ulli sacerdotes chorum ulla hora diei et noctis soli ingrediantur.

De officio ecclesiae celebrando.

XXXVI. Ut presbyter vel diaconus nunquam ad matutinas legat eis evangelium, praeter Liber generationis in Natali Domini et in Epiphania Domini, Factum est.

XXXVII. Ut in Purificatione S. Mariae presbyter [1082A] post missam matutinalem cereos et candelas benedicat, et benedictis recedat.

XXXVIII. Ut in Ramis Palmarum post missam matutinalem rami et flores benedicantur, et evangelium, Cum appropinquasset, a sacerdote dicatur. Ipsae postea solae sine presbyteris et clericis faciant processionem per claustrum, et adorent crucem.

XXXIX. Ut in Parasceve cum presbyteris et clericis cantent Popule meus, et Agios sine eis, ita ut illae nunquam eis respondeant.

XL. Ut infirmae nunquam inungantur, aut communicentur, nisi in ecclesia.

De ritibus ecclesiasticis.

XLI. Ut defunctis, sorores eis faciant obsequium, presbyteris tantummodo collectas ad altare dicentibus; [1082B] facto autem obsequio egrediantur sorores in claustrum, et celeraria sit parata, cum una de senioribus ad ostium sacerdotibus et fratribus aperiendum. Tunc sacerdotes et fratres deferant corpus ad tumulum, illis in claustro remanentibus, et nunquam ad sepulturam defunctae euntibus

XLII. Ut nullum scienter excommunicatum in coemeterio suo recipiant.

XLIII. Ut major priorissa recipiatur ubique et in ecclesiis Fontis Ebraldi, et in omnibus cellis ejusdem Ecclesiae, et obediatur ei, habeatque potestatem post abbatissam de negotiis ecclesiae agendis.

XLIV. Ut defuncta abbatissa in status sui dignitate permaneat et plenariam potestatem habeat regendi ecclesiam, donec alia substituatur abbatissa [1082C] de conversis sororibus; prout magister noster Robertus constituit et hoc cum oratione et jejunio.

Statutum abbatissae.

Statuit etiam abbatissa ut in manum priorissae majoris veniant decimae denariorum et argenti, et pullorum, equarum, et vitulorum, et equorum, qui dabuntur ecclesiae, ut ipsa ex hujusmodi donis faciat pitantias in refectorio in septimana, non in Dominicis nec in festis diebus.

Ritorno alla pagina sulla "Regola di Fontevrault"

Ritorno alla pagina iniziale "Regole monastiche e conventuali"

14 novembre 2021 a cura di Alberto "da Cormano" alberto@ora-et-labora.net