SYNODI PRIMAE AQUISGRANENSIS DECRETA AUTHENTICA

<SYNODI PRIMAE AQUISGRANENSIS

DECRETA AUTHENTICA>

Aquisgrani in palatio

die 23. mensis Augusti anni 816 promulgata»

Estratta da “Corpus Consuetudinum Monasticarum”, (CCM), Tomus 1. Recensore: Joseph Semmler, pagg. 457-468.

Ed. F. Schmitt, Sieburg 1963.

Anno incarnationis domini nostri Iesu Christi DCCCXVI imperii uero gloriosissimi principis Hludowici tertio anno X. Kalendas septembris cum in domo Aquisgrani palatii quae Lateranis dicitur abbates cum quam pluribus una suis resedissent monachis haec quae subsecuntur capitula communi consilio ac pari uoluntate inuiolabiliter a regularibus conseruari decreuerunt.

I. capitulum, ut abbates mox ut ad monasteria sua remeauerint regulam per singula uerba discutientes pleniter legant et intellegentes domino opitulante efficaciter cum monachis suis implere studeant.

II. Ut monachi omnes qui possunt memoriter discant regulam.

III. Ut officium iuxta quod in regula sancti Benedicti continetur caelebrent.

IV. Ut in coquina, in pistrino et in ceteris artium officinis propriis operentur manibus et uestimenta sua lauent oportuno tempore.

V. Ut nullo umquam tempore post Uigilias causa dormiendi nisi contigerit eos ante horam constitutam surgere ad lectos redeant suos.

VI. Ut uolatilia intus forisue nisi pro infirmitate nullo tempore cornedant.

VII. Ut balneis generaliter tantum in Natiuitate et in Pascha Domini ueruntamen separatim utantur.

VIII. Ut non in Quadragesima nisi in Sabbato Sancto radantur, in alio enim tempore semel per quindecim dies radantur.

VIIII. Ut poma et lactucas nisi quando alius sumitur cibus non comedant.

X. Ut certum fleutomiae tempus non obseruent, sed unicuique secundum quod necessitas expostulat concedatur et specialis in cibo et potu tunc consolatio prebeatur.

XI. Ut si necessitas poposcerit ob operis laborem post refectionem uespertinam etiam et in Quadragesima pari modo et quando officio mortuorum ce1ebratur priusquam lectio Completorii legatur bibant.

XII. Ut cum a quoquam priore suo increpatus quis eorum fuerit Mea culpa primo dicat, dehinc prosternens se illius pedibus cum cappa si habuerit ueniam petat et tune iubente priore surgat et unde interrogatus fuerit rationem humiliter reddat.

XIII. Ut soli uidelicet sine alio fratre in uia non dirigantur.

XIIII. Ut sibi conpatres conmatresue non facient et nullam quamlibet mulierem osculentur.

XV. Ut nudi pro qualibet culpa coram fratrum obtutibus non flagellentur.

XVI. Ut si necessitas fuerit eos occupari in fruges colligendi aut in alia opera non murmurent.

XVI. Ut si necessitas fuerit eos occupari in fruges colligendo constitutum legendi et meridie pausandi tempus pretermittatur et operantes non murmurent.

XVII. Ut quarta et sexta feria ieiunantes ante Nonam aut post Nonam si necessitas fuerit iuxta prioris arbitrium leuia opera exerceantur.

XVIII. Ut in Quadragesima libris de biblioteca secundum prioris dispositionem acceptis aliis nisi prior decreuerit expedire non accipiant.

XVIIII. Ut eis uestimenta nec multum uilia nec multum pretiosa sed mediocria dentur.

XX. Ut si infra positae mensurae decreuerit abbas causa necessitatis quippiam augeri in illius maneat potestate. Alioquin hoc omnino prouideat, ut camisias duas et tunicas duas et cucullas duas et cappas duas - quibus uero necesse est addatur tertia - et pedules quattuor et femoralia duo, roccum unum, pelliciam usque ad talos unam, fasciolas duas - quibus autem necesse est itineris causa alias duas - manicas quas uulgo uuantos appellamus in aestate et in hieme uero muffulas ueruicinas, calciamenta diurna paria dua, subtalares per noctem in aestate duos, in hieme uero soccos, saponem sufficienter et uncturam, pinguedinem ad esum excepto sexta feria et uiginti diebus ante Natiuitatem Domini et septimana Quinquagesima, ubi autem uinum non . est unde emina detur duplicem eminae mensuram de ceruisa bona, et quaecumque praeter haec regula iubet singuli eorum cum necessitas expostolauerit absque dilatione accipiant.

XXI. Ut in Quadragesima sibi ut in alio tempore uicissim pedes lauent et antifonas huic officio congruentes decantent. In Cena uero Domini pedes fratrum si ualet abbas lauet et osculetur, demum manu propria poculum eis porrigat.

XXII. Ut mandatum si tempus est cenae tam fratrum quam etiam et peregrinorum post cenam fiat.

XXIII. Ut ea quam monachi sui habent mensura sint abbates contenti in manducando, in bibendo, in dormiendo, in uestiendo, in operando, quando in aliis non fuerint utilitatibus occupatio

XXIIII. Ut uillas frequenter et nisi necessitas coegerit non circumeant neque suis illas monachis custodiendas committant. Et si eos ire ad eas necessitas fuerit expleto necessitatis negotio ad sua mox monasteria redeant.

XXV. Ut abbas uel quispiam fratrum ad portam monasterii cum hospitibus non reficiat, in refectorio autem omnem eis humanitatem manducandi ac bibendi exibeat. Ipse tamen ea cibi potusque mensura contentus sit quam reliqui fratres accipiunt. Si uero propter hospitem uoluerit ad solitam mensuram fratribus sibique aliquid augere in sua maneat potestate.

XXVI. Ut seruitores non ad unam mensam sed in propriis locis post refectionem fratrum reficiant quibus eadem lectio quae fratribus recitata est recitetur.

XXVII. Ut lectori nihil nisi quod regula iubet detur.

XXVIII. Ut Alleluia in Septuagesima dimittatur.

XXVIIII. Ut praepositus intra et extra monasteria post abbatem maiorem reliquis abbati subditis habeat potestatem.

XXX. Ut monachis nisi monachus non constituatur praepositus.

XXXI. Ut nullus episcoporum monachis uolatilia comedere praecipiat.

XXXII. Ut seniorum monasterium circumeuntium quidam cum fratribus in oboedientiam exeant, quidam in monasterio propter custodiam remaneant. XXXIII. Ut nouitio non facilis monasterii tribuatur ingressus; et ut in cella hospitum probationis sub causa hospitibus seruiat, res uero si quas habet parentibus suis commendat. Expleto probationis suae anno secundum quod regula precipit inde faciat. Ipse uero nec tundatur nec uestimenta sua pristina inmutet priusquam oboedientiam promittat.

XXXIIII. Ut quando fratres post Sextam dormiunt qui eorum uoluerit legere in ecclesia aut in lectis suis legat.

XXXV. Ut in Quadragesima usque ad Nonam operentur fratres quatenus missa celebrata congruo tempore reficiant.

XXXVI. Ut carcer his qui fugere aut pugnis baculisue inter se uoluerint confligere aut quibus ex integro facte sunt regulares discipline habeatur huiusmodi quod in hieme ignis possit accendi et atrium iuxta sit quo possint quod eis iniungitur operari.

<I> Vt in ieiunio Quatuor Temporum nullus cibus sumatur alius, nisi ille sicut in Quadragesima constitutum est a sanctis patribus, similiter in Capite Ieiunii.

<II> Vt in hebdomada Paschae in claustro non loquantur, sed lectio diuina ab omnibus teneatur, similiter in hebdomada Pentecostes et in omnibus diebus dominicis seu in Natali Domini et in omnibus sanctorum festis praecipuis. <III> Vt in domo infirmorum non manducent sine licentia prioris neque bibant.